71 milionë euro grant për bujqësinë nga IPARD 2014-2020, Shqipëria dorëzon kërkesën pranë KE

Dorëzohet kërkesa për Marrjen e të Drejtave të Zbatimit të Buxhetit për programin IPARD 2014-2020.

Shqipëria ka bërë një përparim të rëndësishëm në përgatitjet për zbatim të programit IPARD II. Strukturat dhe kapacitetet janë zhvilluar gradualisht me mbështetjen e projektit IPA 2011 “Mbështetje për Bujqësinë dhe Zhvillimin Rural” nëpërmjet një skeme grantesh pilot “IPARD LIKE” për investime në bujqësi, në prodhim, përpunim e tregtim që shënjestrojnë sektorët e qumështit, mishit, fruta – perimeve duke synuar modernizimin dhe përafrimin gradual me BE.  Nga zbatimi i kësaj skeme rezultoi se ka nevojë për mbështetje financiare në sektorin Bujqësor dhe Rural. Vlera e grantit në dispozicion të aplikimeve të mundshme e tejkalon tri-herë buxhetin e thirrjeve.

Programi IPARD është miratuar me vendim të Komisionit Evropian datë 20 Korrik 2015 dhe financohet nëpërmjet Kontributit të BE me 71 milion euro dhe bashkë-financim nga buxheti i shtetit Shqiptar afërsisht 24 milion EUR. Ky program ka si synim të mbështetesë fermerët, sipërmarrjet ekonomike bujqësore, përfshirë kooperativat, stabilimentet e përpunimit ushqimor, personat fizik ose juridik mikrobizneset dhe sipërmarrjet e vogla private jo-bujqësore të kryejnë investime për prodhimin dhe përpunimin në sektorin e qumështit, të mishit, fruta-perimeve, bimëve të mbrojtura dhe vreshtave.  Gjithashtu programi synon të mbështesë investimet në Akuakulturë, turizëm natyror dhe rural dhe prodhim të energjisë së rinovueshme.

Treguesit dhe objektivat parashikojnë se në përfundim të këtij programi do të mbështeten afërsisht 2055 projekte investimi dhe do të krijohen rreth 800 vende pune. Zbatimi i këtij programi parashikohet të fillojë në vitin 2017.

Struktura menaxhuese në Ministrinë e Financave dhe ajo Zbatuese në Ministrinë e Bujqësisë, Zhvillimit Rural dhe Administrimit të Ujrave, pasi kanë finalizuar paketën e akreditimit me mbi 1200 dokumente mbi modalitetet administrative, kontabël të pagesave dhe kontrollit të brendshëm, kanë dorëzuar sot më datë 20 Shtator 2016, pranë Komisionit Evropian, Kërkesën për marrjen e detyrave të Zbatimit të Buxhetit për programin IPARD për masat:

1. Investime në Aktive Fizike të Njësive Ekonomike Bujqësore, me shumën indikative të akorduar nga BE prej 31,000,000 EUR. Përfituesit potencialë të kësaj mase janë fermerët, personat fizikë e juridikë sipërmarrjet ekonomike e bujqësore dhe kooperativat e regjistruar në regjistrin Kombëtar të Fermave dhe në QKR. Kontributi i BE për këtë masë do të jetë 75% të totalit të mbështetjes publike. Investimi i  Pranuar për Projekt është ≥10,000 EUR ≤500,000 EUR. Një aplikant mund të përfitojë më shumë se një projekt investimi për këtë masë me kusht që mos të kalojë 1,500,000 EUR. Përfituesi përpara se të marrë pagesën përfundimtare në momentin e përfundimit të investimit, duhet të përmbushë standardet përkatëse të BE në mbrojtjen e mjedisit dhe mirëqenien e kafshëve.
3. Investime në Aktive Fizike për Përpunimin dhe Tregtimin e Produkteve Bujqësore dhe të Peshkimit me shumën  indikative të akorduar nga BE prej 26,500,000 EUR. Përfituesit potencialë të kësaj mase janë stabilimentet e përpunimit ushqimor që kanë të punësuar më pak se 250 persona ku xhiroja vjetore nuk e kalon 50,000,000 EUR dhe/ose një bilanc vjetor që nuk e kalon vlerën e 43,000,000 EUR.  Personat Fizik ose Juridik me jo më shumë se 25% të kapitalit të tyre në pronësi publike të regjistruar në QKR dhe sipas rastit në QKL. Përqindja e Kontributit të BE-së është 75% e totalit të mbështetjes publike. Investimi i pranuar duhet të jetë  ≥25,000 EUR ≤ 2,000,000 EUR. Një aplikant mund të përfitojë më shumë se një projekt investimi me kusht që të mos kalojë vlerën 2,000,000 EUR. Përpara kërkesës përfundimtare për pagesë investimi duhet të ketë përmbushur standartet e BE lidhur me mbrojtjen e mjedisit, shëndeti  publik, mirëqënia e kafshërve dhe mbrojtja në mjediset e punës.
5. Diversifikimi i Fermave dhe Zhvillimi i Biznesit me shumën indikative të akorduar nga BE prej 11,000,000 EUR. Përfituesit potencialë janë fermerët, sipërmarrjet ekonomike bujqësore, mikrobiznese dhe sipërmarrjet e vogla private jo-bujqësore të regjistruara në regjistrin kombëtar të fermave dhe QKR. Përqindja e Kontributit të BE-së për këtë masë është 75% e totalit të mbështetjes publike. Investimi i pranuar duhet të jetë ≥10,000 EUR dhe ≤ 400,000 EUR. Një aplikant mund të jetë përfituesi i më shumë së një projekti me kusht që të mos kalojë vlerën 600,000 EUR. Përpara kërkesës përfundimtare për pagesë, investimi duhet të plotësojë standartet minimale kombëtare në fuqi.

Programi do të fillojë zbatimin  me marrjen e besimit nga KE të zbatimit të buxhetit të alokuar për Shqipërinë në vitin 2017, ku Agjencia e Pagesave (AZHBR), së bashku me Autoritetin Menaxhues në Ministrinë e Financave, do të hapin thirrjet për dorëzimin e aplikimeve ku do të përcaktohen kriteret e përzgjedhjes, afati i dorëzimit të dokumentacionit dhe buxheti në dispozicion.

Gjithashtu programi parashikon financim:

1. Për projekte për ndërtimin dhe përmirësimin e pronave të paluajtshme dhe blerjen e makineve të reja mbi 3 milion euro koston e plan biznesit deri në 3% e shpenzimeve të këtyre investimeve.
2. Për  projektet e ndërtimit dhe përmirësimit të  pronave të  paluajtshme dhe blerjen e makineve të  reja ≥1,000,000 EUR por jo më  shumë  se 3,000,000 EUR koston e plan biznesit deri në  4% e shpenzimeve të  pranueshme për këto investime.
3. Për projektet e ndërtimit dhe përmirësimit të pronave të paluajtshme dhe blerjen e makineve të reja ≤1,000,000 EUR koston e plan biznesit deri në  5%  e shpenzimeve të  pranueshme për këto investime.