Ministra Ibrahimaj takohet me ambasadoren e SHBA, Juri Kim

Ministrja e Financave dhe Ekonomisë, znj. Delina Ibrahimaj, priti në një takim kortezie Ambasadoren e Shteteve të Bashkuara në Tiranë, znj. Juri Kim.

Shtetet e Bashkuara të Amerikës janë një partner i çmuar i vendit tonë dhe këtë e dëshmon edhe mbështetja e pakushtëzuar gjatë 30 viteve të marrëdhënieve tona të shkëlqyera diplomatike.

Gjatë këtij takimi u diskutua mbi reformat që po ndërmerr qeveria shqiptare, me qëllim miradministrimin fiskal dhe rritjen e transparencës në hartimin e politikave buxhetore.

Ministrja e Financave dhe Ekonomisë shprehu bindjen se zbatimi i plotë i Reformës në Drejtësi, lufta ndaj evazionit fiskal dhe parandalimit të pastrimit të parave mbeten sfida, për të cilat qeveria shqiptare është e angazhuar maksimalisht, me qëllim progresin e vendit dhe krijimin e kushteve të favorshme për Investimet e Huaja Direkte.