Zhvillohet takimi i 15-të i Komitetit Drejtues të Menaxhimit te Financave Publike 

Nën drejtimin e Ministres së Financave dhe Ekonomisë, Delina Ibrahimaj, u zhvillua takimi i 15-të i Komitetit Drejtues të Menaxhimit të Financave Publike.

Qëllimi i takimit ishte diskutimi dhe miratimi i Raportit të Monitorimit për vitin 2021 i Strategjisë së Menaxhimit të Financave Publike 2019-2022, ndërsa u prezantuan disa prej arritjeve të shënuara gjatë vitit 2021 sa i përket realizimit të objektivave të vendosura në këtë Strategji.

Më konkretisht, arritjet kryesore janë:

Ulja e raportit të borxhit publik ndaj Produktit të Brendshëm Bruto në krahasim me vitin 2020;

Përmirësimi dhe rritja e të ardhurave nga taksat dhe doganat;

Ulja e detyrimeve të prapambetura;

Forcimi i planifikimit strategjik dhe menaxhimi i buxhetit në nivel lokal;

Përfshirja më e madhe e shoqërisë civile;

Përmirësimi i kuadrit ligjor në fusha të ndryshme;

Krijimi i një sistemi më të fortë të menaxhimit financiar dhe mjedisit të kontrollit të brendshëm;

Rritja e nivelit të zbatimit të rekomandimeve të Kontrollit të Lartë të Shtetit.

Pavarësisht arritjeve të mësipërme, u pohua fakti se ka ende fusha të cilat kërkojnë angazhim dhe vëmendje më të lartë për të arritur në nivelet e duhura dhe u shpreh angazhimi i Ministrisë së Financave dhe Ekonomisë për të rritur përpjekjet për adresimin dhe realizimin e tyre, në bashkëpunim me njësitë përgjegjëse.

Në takimin e 15-të të Komitetit Drejtues të PFM morën pjesë Sekretari i Përgjithshëm i Ministrisë së Financave dhe Ekonomisë, përfaqësues nga njësitë brenda Ministrisë së Financave dhe Ekonomisë, Kontrolli i Lartë i Shtetit, Agjencia e Prokurimit Publik, Komisioni i Prokurimit Publik, Drejtoria e Përgjithshme e Tatimeve dhe Drejtoria e Përgjithshme e Doganave, si dhe përfaqësues nga Partnerët për Zhvillim dhe Integrim.